हिशेब थोडा बाकी आहे....
अजून उगा मोहरून येतो
तुझ्या घराच्या पुढील रस्ता
अजून ढळत्या रात्रफुलांचा
हिशेब थोडा बाकी आहे.
कमरेमध्ये किंचित वाकून
अदबिने मज हसतो बघुनी
तुझ्या दारच्या प्राजक्ताचा
हिशेब थोडा बाकी आहे.
कसे हिंडलो नशेत आपण
वेचीत किरणे त्या चंद्राची
त्या चुकार चन्द्रकिरणांचा
हिशेब थोडा बाकी आहे.
उरात तेव्हा अविरत चाले
आतुरतेचा फुगडी झिम्मा
अधीर उताविळ त्या श्वासांचा
हिशेब थोडा बाकी आहे..
अजून आहे तसाच चिकटून
अंगांगाला तुझा गोडवा
ओठावरल्या अवीट चवीचा
हिशेब थोडा बाकी आहे.....
महेन्द्र गौतम.