हा माझा भारत आहे. धर्मनिरपेक्षता, पुरोगामित्व, सहिष्णुता यांचा पुळका आणनारा.
२०२० मध्ये महासत्ता होण्याचा आव आणनारा……….
इथे शोषणाविरुद्ध विधायक मार्गाने लढणार्याला डोक्यात गोळ्या खाव्या लागतात…
आणि अनुष्ठानाच्या नावाखाली कोवळ्या मुलींचं शोषण करणार्या छी** बाबासाठी जेलभरो होत, त्याची निर्लज्ज पाठराखण केली जाते.
भारत म्हणजे मी
भारत म्हणजे तू
भारत म्हणजे 'आपण'……….
-----------------------------------------------------------------------------------------------------------
मी एक गांडूळ तू एक गांडूळ
तो एक गांडूळ ती एक गांडूळ
आपण सगळे गांडूळ गांडूळ
मड पडेतो खाणारे गांडूळ
घाणीतच राहणारे गांडूळ
मरता मरता या दुनियेला
पौष्टिक खत देणारे गांडूळ
आपण सगळे गांडूळ गांडूळ
बाबा, बुवा, मा,अम्मां, बापु.
सा-यांना भजणारे गांडूळ
खादी खाकी करी कुरघोडी
सुखे घरी निजणारे गांडूळ.
आपण सगळे गांडूळ गांडूळ
--------------------------------------------------
गांडूळाना नसतो धर्म
गांडूळाना नसते जात
कोणी यावे चिरडून जावे
गांडूळाना नसती दात
वादळानो एक व्हा रे
बारुदानो पेट घ्या रे
गांडुळानो नाग व्हा रे
गांडुळानो नाग व्हा रे….
(गांडूळांचे पुन्हा नाग होऊ दे या आगामी दणक्यांच्या संग्रहातून )
महेंद्र गौतम….
